O mot dou més : montagna

05 août 2015

(patoué dé Bretsón)

Pé le montagne dé a Val d'Ohta, o 2015 l'ét eun an reutcho dé anniversére : son 150 an dé corra son montà pé o premì co so o mon Cervin é 50 an dé corra l'an ivert o tunnel dou Mont-Bianc. Tsi douch épizode l'an aidà a tchandjé dou teut l'ichtouére économécca é sotchala dé a Val d'Ohta : o premì, perquè l'a marcà l'énvión dé a sajón dou tourisme echportif qué l'a portà i grouse manifechtatsión dou djor dé ouèi (comme o Tor di Géants ou o Trofeo Mezzalama) ; o sécón, perquè l'at ivert a nohtra piquioda réjón i trafécco commertchal é a y ehtchandjo économécco eouropéèn, én confirmèn a cha londja traditsión dé crojà pé le djen, l'économéa é a queulteurra.

Pé tsou més tsé, vo propozén dé dehquevrì a montagna, qu'a sé troa ouèi oui mentén dé traditsión é modernité.

O pouént dé dou qué modé pé tsou vouéyadjo l'é eun ehcreut dé Saverio Favre é d'Alexis Bétemps - La montagne et ses noms - qué vo prézentén vents a sétsión Teste én légna, tradeut én patoué dé Bretsón é dé Émaveulla. Én lo léèn, poeu peu dehcovrì pamacque le non én patoué dé a « montagna », ma acheu le valour traditsionél qu'a portae é qu'i yiron soèn guiettà a eunna économéa dé campagna, qué ouèi non quieutta dacohte.

Peu, vents a sétsión Lettérateurra, vo minén lére eunna padja dé René Willien, In cordaye ba di Pavillon, qu'a couénta l'aventeurra dé net dé douch guide d'un co, é a poézì Montagne de mé dé Pierre Vietti.

Papré, én intrèn vents a sétsión Aprénde, le pi piquiot poéràn sé régalé én colorèn le dessèn di béhte dé a montagna.

Pé levré, comme d'acohtuma, vo quieuttén éntó eunna piquioda ehproa dé patoué so o mot montagna...

becca   mon   montagna  montagne  mountagna