(patouè dé Tchalàn Damoùn)
« Imadje é matériel didattécco » l'et la noua sétsión qué sortérat dumarts 13 dé noémbro 2013 en a « Aprende », lo cantón pé li pi pitiot !
L'et la prumira dé eunna sérì dé sortiè qué propozón dé fiche é dé matériel didattécco pé fére apréndre lo patouè in damourèn.
Tsi co y argumàn propozà son guiettà a via dé touit li djor :
- L'alfabé ;
- Li numérot dé 1 a 10 ;
- Li par dou corps ;
- Li dras ;
- Li color é li forme ;
- Li pronón personnel ;
- Li contrére.
Pé li différèn argumàn son propozà différénte attivité : ezersise pé introdouire a l'ehcriteura, djeuc su la lénga, conte, tchantsón é dessèn a coloré.
Lo matériel l'at ichtà fét in impièn diférèn patouè, ou fon dé totte li fiche noun pot troé lo patouè impià.
Lo formà di documèn permet dé tchandjé li teste pé buté-ie en ou patouè qué noun vot.
In tseutta sétsión li parèn é y enségnàn poon troé dé attivité amuzante a fére davo li minà.
Lo Guiché Lénguistécco l'et dichponibio pé dé consèi ou pé dé démande dé matériel « su mézeura ».