No fitèn lo premì an de la lettra d’eunformachón

13 octobre 2014

(patoué de Tsaensoù) 

Nèissia lo mèis d'otobre de l'an 2013, la lettra d'eunformachón l'a djeusto fitoù eungn an de via. N'en voulù partadjì avouì vo, deun seutte doze mèis, noutro traaille é vo féye cougnitre pi a fon lo francoprovensal.

Lo projé l'è crèissì avouì lo ten é s'adrèche a todzor pi de dzi: pe lo momàn le-z-eunscrì son 223. De seutte, 98 l'an cherdì de liye le noalle eun lenva franséze, 46 eun lenva italienna é 79 eun lenva francoprovensala.

N'en publià bramente de noalle que prèdzon di contenù (matériel, teste ou séchón) que n'en beuttoù deun lo portail - utillo churtuoù i dzi que l'an coutimma a eumpléyì lo site ; di-z-événemàn organizoù eun Val d'Ousta, eun Piémón ou bièn de l'atro coutì di frontchiye si lo patoué ; di course ou di concoù eun lenva ou di-z-avì pe baillì de-z-euntsardzo deun l'Aministrachón pebleucca llattoù a la lenva minoritéra.

Vo remersièn pe lo ten que l'ade dedia-no deun seutte mèis, pe le complemèn resì é pe l'attenchón que contegnade a no dimoutrì.

No sen todzor disponiblo pe de nouile propozechón ou conseille que voulèide no baillì pe perfechon-ì lo servicho ou pe comprende mioù le sujé que vo lamade bièn.

Pe sisse que l'an panco fé l'eunscrichón, é que lamérian la féye, fa eunsérì l'adresse de pousta eléttroneucca deun lo caroù a drèite de la padze d'aqueille.

Mersì a tcheut !