(patoué de Tsaensoù)
Dèi oueu l'è eun leugne lo course de formachón « Lo patoué i buró » que propouze eun parcour seuntéteucco mi concrette di situachón que accapiton pi chouèn deun le rappoo de traaille : seu no accapèn le-z-espréchón pi utille é eun conseille le djeust comportemèn que fa avèi avouì le dzi.
La séchón, que l'è itaye pensaye pe eungn uzadzo prateucco é pe itre eumpléyà fasilamente, l'è divijaye eun 5 partiye : « I traaille », « Prèdjì eun pebleuque », « I téléfonne », « Documeunt, pagameunt é rimoustreunsi », « Deun le llouà pebleuque ».
Tsaque tsapitre l'è divijà eun doe partiye : eunna premiye partiya prézente le vidéo di lesón. Eun pou liye sen que l'eunségnàn di, grase i soutitre que son itoù icriet deun la variante de patoué que l'espèe eumplèye. Eun pou étó chedre de avèitchì la lesón avouì le soutritre eungn italièn ou bièn eun fransé.
I fon de seutta partiya, no accapèn le-z-annesse iaou le contenù di lesón son icriet é tradouì eun lenva italienna é franséze. Eun pi no retrouèn de-z-annesse lessical que consernon surtoù lo lesseucco pi spésefeucco comme le-z-euntsardzo deun le buró, le termo llattoù i transpoo, le-z-abbréviachón é de-z-annesse de grammére si le lesón prézentaye.
Lo course eun leugne - réalizoù pe la Réjón otonomma Val d'Ousta é la Réjón Piémón, deun lo projé financhà pe la Prézidanse di Conseille di Ministre- lloué 482/99 - permé de terryì profì di ten de la formachón é de favorizé eungn efficase apprentissadzo sensa avèi fata de occupì eun caro feseucco, que la coutima l'é considéroù eungn eumpourtàn fatteue de la communicachón.