(patouè de Veullanoua)
Eungn occajón de la conféranse di servicho, que l'è reustéte féte lo 1i mase pasó avouì la prézanse di dirijàn de l'écoula, l'Assesseur a l'éducachón é a la queulteua de la Réjón otonomma Val d'Ousta, Laurent Viérin, l'a annonchà l'euntenchón de euntrodouire - deun an fourma espérimantala - l'eunsègnemèn di patouè deun le-z-écoule pe l'an scolère que dèi comenché.
Lo paotuè s'eunsérèi a plen titre deun le propozichón de formachón di-z-écoule de la Réjón, comme opportunitó eun pi i defuoua de l'oréo d'écoula, pe eunretsì le poussibilitó d'apprentissadzo.
To ho l'è poussiblo mersì a an noua consechón di patouè, pomì euntendù comme lenva de la tradichón mi comme lenva d'euntégrachón, que aprotse le dzi é iàn patrimouéno de totta la comunitó.
Lo patouè a l'écoula se eunsérèi deun lo cadre d'an sériye de propozichón que l'an comme but hi de tchandjé la perséchón de heutta lenva, pe fée euntéréché i patouè euncò hisse que l'an po pousu-lo apprendre a mèizón.
Lo susè de l'École populaire de patois é di manifestachón organizéte pe l'Assessorà, comme la commédì muzicala Tourna avouì mè, demouhon l'euntérè que la comunitó valdotèna l'a pe heutta lenva, que reusque de vin-i oubliéte se se fé po ren pe la mantchan-ì su lo nouho territouéo, eunna di dirii réalitó ioi que lo patouè l'è euncò vivàn.
L'écoula ian-pe donque eun poste idéel de formachón leungueusteucca é queulterella, ioi que lo patouè sarè moutró deun an magnii noua é fritse pe mantchan-ì oo l'euntérè di-z-écouillì.
A hi propoù, an comichón que l'è reustéte féte pe heutta rèizón, l'è dza i traille pe tedjé de propozichón concrète. Eun collaborachón avouì le dirijàn de l'écoula vignérè féte an retsertse pe comprendre l'euntérè di fameuille eunver heutta poussibilitó é, aprì l'analize di rezultà, sarèn séléchoun-ù tri pole scolère - deun la ota, la mouayenne é la bosa valoda - pe deustrebué su lo territouéo heutta noua poussibilitó de formachón.
Avouì lo but de valorizé le variétó de patouè, lo projè prévèi, pe l'avin-ì, de baillé heutta opportunitó i-z-écoule de totta la réjón.