(patoué de Tsaensoù)
Aprì la Pimpa, Projè Popón é La conta di ra, la collaborachón euntre l'Assessorà de l'éducachón é de la queulteua é lo fameu dessin-ateue Altan, s'eunretsèi de eun nouì tsapitre avouì la publicachón di livro dessin-à Lo ninno è lo tsaret.
La conta, que pren eunspirachón de la tradichón valdoténa, l'è itaye pensaye comme eungn èidzo didatteucco pe lo projé d'eunségnemèn pa obligatouéo di patoué deun le-z-icoule - voulì pe l'Assessorà dèi l'ifouriì 2013 - mi pou reprézenté eungn eunstremèn valido é amuzàn pe approtchì le nouile jénérachón i patoué, mimo defoua de l'icoula.
L'et, eungn effé, an conta plèizenta, que baille churetoù i mèinoù é - avouì le dzen dissèn - perméttré d'approtchì pocca pe cou la lenva di vioù de noutra téra é lo conteste queulterel iaou se plache, grase étó i-z-occajón que la conte bièn chouèn no baille.
Le critére que l'an permettì de chedre le teste, deun noutro gran patrimouéno, son bièn : n'at de motivachón llattaye a la lenva, a l'etnografia é a la pédagojia que reprézenton la baze di difièn traaille que fa féye can eun chouì eun parcoù d'apprentissadzo.
Comprendre é aprende le paolle di teste l'è pi fasilo, grase a sa seumpla streutteua é a la prézanse d'élémàn que se repetton; le llouà, comme étó le personadzo é le tré di prèdjì eunfanteillón que son reportoù deun la conta no baillon l'occajón pe reprendre de-z-élémàn de la queulteua valdoténa ; le contenù baillon, pe fenì, bièn de possibilitoù pe mioù cougnitre le-z-aspé llattoù i téatro, a la mezeucca, i lesón morale, a la trasmechón di bon santemèn, é pe tornì valorizé la fonchón d'éducachón que l'an le dzi pi viille que no...
(patoué dé Bretsón)
L'Assessorà dé l'éducatsión é dé a queulteurra énforma qué o lévro Lo ninno è lo tsaret vègnérà donà a y ehcoyé éntéressà pé a séconda éditsión dou projet dé a Surénténdéntsa a y ehcole Le patois à l'école, qu'ou l'énvionérat o més d'avrì én verquiénte ehcole dé a réjón.