(patoué d'Euntroù)
Dèi l'an 2008 lo Guetsè lengueusteucco de l'Assessorà de l'éducachòn é de la queulteua l'et eungadjà dedeun la réalizachòn d'eun glosséo eun leugne di patouè valdotèn ; eun di premì glosséo sonore de to lo domène francoprovensal.
Lo glosséo se compouze de dô séchòn : an baze de donné é an bibliothèque eun leugne. Heutte dô séchòn reprézenton eun sistème euntégró, baga que permè a qui l'eumplèye an consultachòn globalla.
A termo, hi projè se propouze de beté eun leugne di mouente an varianta pe tsaqueun-a di 71 quemeun-e valdotène patouazante.
Eun tchagnèn contcho de la complessitó di projè, sen eun tren de beté eun leugne eun glosséo seumplifià, que comprèn a peu prè 1.800 mo cherdù euntrì hise que no-ze semblon le pi eumpléyà dedeun lo langadzo couràn. Tsicque paolla l'et acompagnéye d'eungn anrejistremèn sonore, caze todzor fa de la viva vouése di témouèn que no-z-à baillà lo mo.
Eun hi moumàn sont eun leugne dji glosséo seumplifià complè (Le-z-Amaveulle, Arnà, Brussòn, Tsarvensoù, Cormayoi, Euntroù, Monjovè, Vagrezentse, Vapeleunna é Votornentse) é d'otre tri que no sen eun tren de fenì (Antèi, Chalàn-Sen-Vitor é Fontènemore).
L'utilizateur pou consulté lo glosséo atò lo moteur de retsertse, eungn écrièn lo mo eun fransè, eun patouè ou eungn italièn. Vu que tcheu le mo son étò organizó pe catégoriye (pe-r-ezeumplo : le mammifère, le-z-ijì, lo surnaturel é lo fantasteucco, le diféente partiye di cor etc.) l'è euncó pousiblo fée an retsertse eun partèn d'an séchòn spesefeucca. Dedeun hi cas fou tchan-ì contcho di fé que, vu que tcheu le mo son prèi di glosséo seumplifià, le liste témateucque son pe lo moumàn de liste euncomplette. Pe lo patouè d'Euntrù teteun n'en dza dô liste euntchée, halla di meleun é halla de la lèitiì.
Belle se l'è renque i comensemèn, lo projè di glosséo pou dza conté su eun nombro remarcoblo de vouése.
Voualà le tseuffre :
Mo tchardjà : 36.024. De hise, 26.533 dza dispouniblo eun leugne.
Paradigme tchardjà : 73.147. De hise, a peu prè 65.000 dza dispouniblo eun leugne.
Eunrejistremèn sonore : a peu prè 45.000 fiché, tcheu dispouniblo eun leugne.
Pe le projè eun cantchì, no alérèn beuntoù eunretsì nouho eunventéo atò le mo d'a peu prè 600 sor de fleur é de plante. La lista é le mo eun patouè son ihó prèi di livro de Ivo Lavoyer « Glossologie et flore des Alpes ». A la feun di traille l'eunventéo contérè a peu prè 5.800 non de plante, é topérè l'eunsemblo di patouè valdotèn.
Vu que lo but l'è po hi de contribué a mantchan-ì an prétenduya pureté de la lenva mi pitoù de baillé an reprézentachòn réella di patouè prèdjà i dzor de vouì, lo Glosséo pren po se mo dedeun lo patrimouèno littéréo classeucco valdotèn mi dedeun lo langadzo couràn é dedeun la produchòn écrita di dzor de vouì. Pe la mima rèizòn lo Glosséo séléchoun-e po le termo di témouèn su d'otre baze que su halla de leur attestachòn su plahe « a memouî d'ommo ».
Considéró la grousa variabilitó fonéteucca é lessicalla di patouè valdotèn, variabilitó que tentèn s'acape feunque dedeun la mima fameuille, lo Glosséo prétèn po de prézenté « lo » patouè de la tella quemeun-a (idó que d'ayeur l'è an pura astrachòn) mi se limite a propouzé, pe tsicque quemeun-a, eunna di nombreuze variante pousible, halla prèdjéye de nouho eunfourmateur. L'è pe heutta rèizòn que lo non di témouèn l'è todzor repourtó dedeun la fiche di mo.
Pe conclure, no esprimèn noha pi grousa recougnisanse a nouhe témouèn que, animó d'eungn amour profòn pe nouha lenva é nouho Paì, beutton tsicque dzor a dispozichòn di Guetsè - é sensa demandé ren eun tsandzo - hi mervèilleu trézor de savouer, d'euntouziasme é d'euntélijanse que reprézente l'éritadzo pi présieu de nouha sivilizachòn valdotèna.