(patoué dé Bretsón)
Apré l'echpériéntsa dé l'an pasà, tsi co o patoué ou l'intra offisiellemèn vents l'offre formatif dé y ehcole dé a Val d'Ohta.
Pé tsen, l'Assessorà dé l'éducatsión é dé a queulteurra l'at organizà co pé tseht'an dé cours dé patoué, dechténà i minà dé touì le nivó d'ehcola.
Le cours son facultatif é l'an comme obiétif tsou d'énretchì le cognichéntse a propó di léngue di minà qu'i l'an ehcreu-se.
En tsétta manira, o patoué ou pou sorte di fameuye pé troé un pocht émportàn vents a queulteurra dé a Val d'Ohta, ou mentén d'un reutcho patrimouéne dé léngue qu'a l'é jamé ichtà un limitte pé l'echtrutsión, ma ou contrére un vantadjo perqué aida le djen a ése mins reddo é pieu lecht a aprénde.
Vardé é porté avante le léngue dé a nohtra réjón, én pieuch, vou dire sarvé tsen qu'i l'én dé particuyé é, ou mémo tén, rénde pi fort o santimàn dé fére part d'eunna méma comunité. Tsen pout aidé a fére créche l'idé dé partisipé én manira viva a véa dé a sosiété, qu'a l'én un di but qué l'an propozà o Parlamèn é o Consèi dé l'Eouroppa vents le iour Raccomandatsión a propó dé l'ehcola é dé l'aprentisadjo.
Le 50 cours, dé 7 létsión, comintséràn én verquiénte ehcole a modé dou mé d'avrì pé levré a jouén é saràn choù pé 815 ehcoyé valdotèn.
Pé nen saé mach, dehtchardjeu o Communiqué de presse tsé dezeut.