(patoué de Grésàn)
Chor avouì eun nouo numeró la revua chouimestrala La voix des peuples minoritaires, réalizéye de l'Assessorà de l'Éducachón é de la Queulteua de la Réjòn Otonomma Val d'Ousta, é que, avoué lo Festival des peuples minoritaires, l'é lo mouayén pe la difujón di-z-eunformachón, di baye noalle é di traaille quemeun fé pe valorizé l'idantitoù de tcheu le peuple minoritére.
La publicachón se ivre avoué l'éditorial de l'Assesseur a l'Éducachón é a la Queulteua, Laurent Viérin, di titre « Tisser la toile ».
Va eun devàn, aprì, avouì eun bocón si la dérì édichón di Festival des Peuples minoritarires di 2011, de Giuseppe Corongiu (Réjón Otonomma de Sardigna) é Gérald Péaquin (reprézantàn di Québec).
Pe lo caro « Institutions et territoire », la Fondachón « Émile Chanoux » de Veulla prézénte eungn articllo di titre « Un nouveau souffle » é eungn iteudzo si lo Collège d'Études fédéralistes que l'é itoù fé eungn occajón di Festival.
Vito Specchi, rédatteue de « l'École Valdôtaine », l'é l'oteue de la contribuchón si la didatteucca di titre « Le plurilinguisme et les langues d'enseignement au Luxembourg ». Deun lo mimo caro n'a euncò eungn articllo si la dérì Rancontre annuella di Centre d'Études francoprovençales « René Willien », tabla de disquechón si l'eunsègnemén di lénve minoritére.
Deun lo caro dédià a l'éditorì son prézentoù dou traaille. Lo premì l'é lo livro d'Albert Memmi, écrivén tunizeun de lénva franséze é de trèi queulteue (arabbe, juiffe, fransé), di titre « Portrait du colonisé. Portrait du colonisateur ». La seconda l'é, i contréo, an publicachón portéye eun devàn pe l'Assessorà - eun collaboracón avouì l'Institut d'histoire de la Résistance et de la société contemporaine en Vallée d'Aosteé lo Chapitre de la Colléjala de Sent'Or de Veulla - é réalizéye pe Marie-Rose Colliard, dédiéye a la viya é i-z-euvre de Joseph Bréan. Lo livro, chortì eungn ocajón di séntchimo aniverséo de la nèisanse de si gran Valdotén, l'é fé de dou voleuimo di titre « Un jeune prêtre au cœur valdôtain » é « Langages de l'âme ».
N'a euncò lo caro « Le personnage », iaou Mathieu Guihard, de l'Enstitù queulterel de Brétagne, prézénte la fegueua de Yann Fouéré, militàn bretòn é fédéraliste oropéèn.
Lo numeró de la revua se cllou, pe fenì, avouì lo calandriì di randévoù 2012 é lo teste di documàn final aprestoù eungn ocajón de la dérì édichón di Festival des Peuples minoritaires.
Pouade ditchardjì la revua a la séchón di site dediéye a l'inisiativa.