Tsertsa

Dichonéo

Contenù di site

Multimédià

Teste eun patoué

Documàn

La flore valdoténa deun lo glosséo eun leugne

03 mars 2014

(patoué de Tsaensoù)

Dèi oueu, tcheu le-z-uzajé di site pouon pi troué, deun lo glosséo eun leugne, lo reutso patrimouéno leungueusteucco valdotén llattoù i plante.

L'équipe di Gnalèi l'a eungn éffé fenì de eunsérì caze 6.000 non de plante que Ivo Lavoyer l'a beuttoù eungn odre pendèn dji-z-àn é que l'a publià deun son livro Glossologie et flore des Alpes. Seutta euvra dimoutre fran que eun cou, lo patrimouéno botaneucco l'iye pa maque cougnì pe le spésialiste, mi féjè pitoù partia de la queulteua di péizàn que l'ayàn fata de cougnitre lo mondo di plante pe pourté eun douàn leue attivitoù de tcheu le dzoo.

Oueu, l'è la fasón de vivre que min-ache si patrimouéno de cougnissanse, eun rèizón di gran tsandzemèn - sosial, économeucco é queulteurel - que l'an fran tchandjà le communoté valdoténe.

Eun perméttèn a tcheut de eumpléyì si trézo leungueusteucco, grase i moteue de retsertse di glosséo, no èidzèn pèi lé a mantin-ì lo témouagnadzo de eun mondo passoù, mi no euncoadzèn étó le nouile jénérachón péqué totte seutte retsesse pouèian itre prézervaye é passaye.

Pe tchertchì queun non eun baille a eunna planta d'eungn'atra lenva, le-z-uzajé di site dèyon pi seumplamente icriye lo non - eun fransé, eungn italièn ou eun patoué - deun la fenitra pensaye pe si beut (i sondzón a drèite, si la padze d'aqueuille di site).

Si la fiche de tsaque non fegueue, eun lateun, lo non siantefeucco de l'espése pe izenté de féye de fote. L'é pe la mima rèizón que no trouèn pi bientoù de-z-imadze pe possèi recougnitre pi vitto la planta.

Si traaille l'a l'euntenchón étó de réchì lo souvenì de salle paolle que le patouazàn diavon chouèn eun cou é que son ara caze oubliaye. D'ailleue, lo Guetset leungueusteucco saré contèn d'aqueuillì de noue contribuchón que pouon pi eunretsì lo glosséo.