(patouè de Veullanoua)
L'Assessorà de l'éducachón é de la queulteua annonche que la 3a édichón di Festival des peuples minoritaires, que l'a vu la partésipachón de reprézantàn de 17 peuple frée, é de hisse 3 eun calitó d'eunvitó spésial, l'è fenè desandro 10 sétembre avouì l'approuachón de la décllarachón finala.
Le reprézantàn de la Val d'Ouha, di Québec, de la Galice, de la Sardègne, di Pais Velencià, de la Bretagne, de la Savouè, di Valè, de la Corse, di Frioul, de Coumbouscouro, di Walser (Val d'Ouha, Alagna, Macugnaga é Formazza), di Francoprovensal di Piémón, di Ladins de la Réjón otonomma di Trenteun Süd-Tyrol, di Cimbres, di Mochènes é le-z-Ossitàn fransè é piémontèis se son trouó eun Veulla é, pe doe dzorné, l'an comenchà an refléchón eunsemblo, di poueun de vua tecneucco é poleteucco, su le tème Les racines et les raisons des peuples minoritaires.
Lo programme di Festival, organizó pe l'Assessorà eun collaborachón avouì la Fondation Institut Musical de la Val d'Ouha é avouì la Fondation Émile Chanouxpe lo Collège d'études fédéralistes, l'a offer i partésipàn tri dzor de mezeucca é de-z-approfondissemèn queulterel, avouì de rancontre é de débà, mi étò de poustachón avouì la fonchón de fée cougnihe le difiente minoritó, pe diffujé eun messadzo d'étsandzo é d'iverteua résiproque que èidzèye lo débà eunterculturel euntrì le peuple.
La manifestachón l'è reustéte bièn aprésiéte pe lo pebleuque : pi de 3000 personne, de la Val d'Ouha mi euncò de foua, l'an vezetó le poustachón é partésipó i Collège d'études fédéralistes, i conféranse é i conser di groupe sardégnol Tazenda é Su Nugoresu, di Galiciens Carlo Nuñez avouì la Banda de Gaitas Xarabal é di Québécois de La Bottine souriante, que l'an partadjà lo palque di téatre romèn de Veulla avouì le-z-artiste valdotèn Maura Susanna, Luis de Jyaryot, L'Orage é Chemin de Fer.
L'Assesseur Laurent Viérin se décllare contèn di grou sussè que l'a aù heutta 3a édichón di Festival que l'è crèisù, souà deun le contenù, avouì eun programme d'attivitó todzoo pi reutso é euntéressàn, mi étò a nivó de pebleucco, que l'a manifestó son euntérè é l'a partésipó nombreu i difièn randévoù de la manifestachón. Lo prestije de la rancontre l'è reustó oo mersì étò a la prézanse di dizesatte peuple frée.
La Val d'Ouha, no di todzoo l'Assesseu Laurent Viérin, mersì a hi Festival, l'è vin-a la preunsipala reféranta di mouvemèn pe defendre é valorizé le minoritó de l'Oroppa é di mondo. L'è pe ho que l'è reustó desidó de fée nihe eun forum di peuple frée, que se lemittèye po djeusto a organizé le tri dzourné di Festival mi que durèye deun lo ten pe baillé via, tchica pe cou, a eun santre pe monitoré é documenté l'évoluchón de la situachón di peuple minoritéo, pe le sensibilizé a l'achón é collaboré avouì tcheu hisse peuple que viquèison le mimo problème.
La Val d'Ouha se lemitte donque po djeusto a defendre sa comunitó, mi traille étò pe protédjé le-z-euntérè de tcheu le peuple dispozó a se beuté eunsemblo pe pourté eun devàn le projé que l'an eun qumeun é p'achuré la trasmichón di lenve é di queulteue minoritée deun tcheu le paì ioi heutte son prézente.