• Aqueuille
  • Noalle
  • Eun leugne dou nouì glosséo deun le patoué de Fontènemore é Vapeleunna

Eun leugne dou nouì glosséo deun le patoué de Fontènemore é Vapeleunna

20 juin 2014

(patoué de Tsaensoù)

Dou nouì glosséo son eun leugne si lo site patoisvda.org. Sisse dou glosséo, to pensoù é réalizoù pe lo Guetset leungueusteucco, servicho de l'Assessorà de l'éducachón é de la queulteua de la Réjón otonomma Val d'Ousta que traaille pe mantin-ì la lenva francoprovensala, moutron de fasón caze completta la sitouachón di patoué de oueu de tsaquin-a di doe quemeue, eungn ivrèn eungn espase de caze 1800 termo de patoué eumpléyà deun la via de tcheu le dzor.

Le collaborateue, Mma Agnese Ansermin pe lo patoué de Vapeleunna, é Mma Fiorentina Roux pe sit de Fontènemore, son lo queue de si projé pèi eumpourtàn iaou l'a fallì pi de 10 mèis de travaille. Deun si ten de 10 mèis, no collaborateue l'an tradouì le 1800 termo que son itou-lèi proposoù é tsaquin-a di fraze que accompagnon lo mot pe bièn lo plachì, é lo personnel di Guetset l'è tracacha-se de le-z-eunréjistré, de le transcriye é de le revére di poueun de vua de la grafia, de poulité le-z-eunréjistremèn é de le-z-eunsérì deun lo site.

Eun djeunte a seutte doe variante le-z-atre 9 glosséo eun leugne complet que son dza publià eun leugne (Le-z-Amaveulle, Arnà, Bretchón, Tsaensoù, Cormeyaou, Euntroù, Mondjovet, Vagrezentse é Vatornentse). Si travaille l'è itoù fé grase i cou de man que l'è itoù baillà pe tsaque témouèn que n'en si lo territouéo :

Nella Joly (Arnà), Liliana Bertolo (Le-z-Amaveulle), Roberta Esposito Sommese (Bretchón), Mario Borbey é Francesca Lucianaz (Tsaensoù), Sebastian Urso (Cormeyaou), Daniel Fusinaz (Euntroù), Franca Culaz (Mondjovet), Ernest Gerbelle é Yvette Buillet (Vagrezentse), Yvonne Barmasse (Vatornentse).

Vu que chouèn deun la mima quemeua eun prèdze difiente variante de patoué, lo Guetset prétèn pa de prézentì « lo patoué » de eunna quemeua mi, avouì seumplesitoù, la variante de patoué prèdjaye pe eunna dzi que l'è nèissia é que reste deun salla quemeua.

Si eunstremèn leungueusteucco l'è itoù pensoù pe eun gran pebleuque ; s'adrèche, eun pi, i dzi que son pa de patouazàn é que louon s'approtchì de la lenva francoprovensala, i-z-icoulle, i retsertseur, sensa oubliì tcheu le Valdotèn que, mimo eun prèdzèn patoué, souètton cougnitre mioù ou beutté si lo mimo plan leue variante avouì salla di-z-atre quemeue.

La diffujón eun leugne di glosséo permé d'avèi de publicachón que son pensaye pe le dzi que eumplèyon la tèila, que son contegnallamente tchandjaye, é que s'arrendzon lo mioù pe le nouile fasón de communicachón. Lo sistéma de eundisizachón di site l'è itoù pensoù pe retchertchì pi vito le paolle clla.