Tsertsa

Dichonéo

Contenù di site

Multimédià

Teste eun patoué

Documàn

Ecoula populéra de patouè : gran susè !

09 mai 2019

( Patoué de Veullanoua )

Gran susè pe le course de l'Ecoula populéra de patouè !

L'Assessorà réjonal i Tourisme, Commerse, Spor, Agriculteua é Bièn queulterel, da difien-z-àn, l'a quetó l'organizachón di course de patouè i-z-aministrachón comunale que son euntéréchéye.

Le course, organizó pe lo premì cou l'an 1995, l'an comme but la trasmichón de nouha lenva di queur é, i mimo ten, de la queulteua, de l'istouére é di tradichón que no-z-apartchagnon. Iver a tcheutte, hisse course son pensó pe diféèn livelle é sujé : course pe débutàn, course de perféchoun-emèn, grafì é téatro.

Hit an, dji amministrachón communale l'an partésipó a heutta propozichón : Verrès, Nus, Pollein, Aoste (ioi son reustó organizó dou course), Villeneuve, Valtournenche, Courmayeur, La Thuile, Aymavilles, eun soulignèn eungn euntérè todzor pi for, de la par de la populachón, ver la cougnisanse é l'aprentisadzo di patouè.

Le-z-eunségnàn son reustó apreustó sprèse pe ho é son iscrì deun eungn albe réjonal di-z-esper de patouè.

La partésipachón i course l'è gratouita. Le-z-amministrachón communale beuton a dispozichón le sole, l'atrésateua é lo matérielle neseséo pe fée le course. L'amministrachón réjonala, i contréo, fournì le-z-eunségnàn.

Le course, comenchà lo mèi de noambre 2018, son fenè euntrì la feun de mase é lo comenchemèn d'avrì 2019.

L'euntérè pe l'aprentisadzo de la lenva l'è demouhó pe la partésipachón de eun pebleuque que va di-z-adulte eun penchón, que l'an de ten a dédié a la queulteua, i dzoun-io que traillon deun de milieu ioi que lo paotuè l'è euncò eumpléyà é, deun coutche ca, néséséo pe l'ativitó ; éhandjì ou valdotèn d'adochón que retchagnon eumpourtàn cougnihe la lenva comme stremèn d'euntégrachón ou comme manifestachón de reuspè ver la queulteua locala é, pe fenì, de dzi di poste que l'an po pousù aprendre lo patouè, belle eun viquisèn dedeun an fameuille ou eun conteste ioi lo patouè l'è la lenva preunsipala.