(patouè d'Euntroù)
Di premì i tri de joueun la quemeun-a de La Sola l'a resè la vezeutta d'eun groupe de dzi bièn spésial : le partesipàn i trijimo « Ben de lenva », édichòn 2012, organizó de l'Assessorà réjonal de l'éducachòn é de la queulteua. Le 24 partesipàn, d'eungn éyadzo comprì euntrì le 5 é le 70 an , l'an pousù decouvrì le particularitó de heutta dzenta localitó de la Valdigne a traé son istouare, se personadzo, se chan, se tradichòn é surtoù son dzen patouè, seulla lenva offisiella de hise tri dzor de découverta.
Hi « rendez-vous », que l'è eun tren de s'affirmé comme eun di poueun de fouse de l'offre de l' « École populaire de patois », l'a vu euntrì le-z-otre la partesipachòn d'eun Chouisse é d'an cobbla d'étudiàn Amériquèn de l'« University of Illinois at Urbana-Champaign », que se trouoon eun Valoda d'Ouha p'an retsertse sur la vitalitó de se lenve istoreucque é su leur rapor avouì l'identitó valdotèna. A la feun di staje leur étò, comme tcheu le partesipàn, son repartì avouì lo queur plen d'émochòn é de dzen souvenir , é avouì lo santimàn d'aì vécù eungn'espérianse umèna é lengueusteucca irripétibla.
A non de l'Assessorà é de to lo « staff » di-z-eunségnàn de patouè dze remersiyo donque totta la comunitó de La Sola pe son acqueuille chalereu.
