Deun lo cadro di-z-inisiative organizéye pe la réalizachón di Projé gueudda pe l'eunségnemèn facultatif di francoprovansal deun le-z-écoulle de la réjón, l'Assesseur a l'éducachón é a la queulteua de la Réjón otonomma Val d'Outa Laurent Viérin, prézente lo programo di déféèn cours de formachón proféchonella pe de-z-esper de patoué que baillerén la possibilitó d'otiin eunna sertificachón de compétanse pe eunségné lo patoué, pe fiye animachón é pe traaillé i Guetset.
Tri caletó de cours son prévue, nésesée pe sertifié seutte compétanse :
- travaillé pe soutiin la diffujón é la valorizachón di francoprovansal é di lenve walser (SMC1) ;
- eunségné lo patoué (SMC2) ;
- réalizé de-z-attivitó d'animachón lengeusteucca-queulterella eun patoué (SMC4).
Lo cours de baze de 78 euye (SMC1), obligatouéo pe totte le-z-atre sertificachón, se teundré di 3 setembro i 17 otobre 2012. Dèisèn, di 3 noembro i 12 janvir di 2013, eun pouré chédre dou cours que baillerén la possibilitó d'avèi déféente sertificachón : lo cours SMC2 (84 euye) é lo cours SMC4 (78 euye). Le cours sarén po deun le mimo dzor pe baillé i-z-eunscrì la possibilitó de le choure tcheu dou.
Le-z-ézamèn, a la feun di cours, se teundrén di 21 janvir i 2 févrì.
Djeusto aprì, eungnouon-pi le cours de patoué é de walser pe le-z-écouillì de totta la réjón que fenèison-pi a la feun de l'écoulla.
Le lesón pe tcheu sisse di cours de baze se teundrén deun la sala "La Grandze" di-z-Amaveulle, menque le-z-atre sarén organizéye su lo téritouéo.
L'avis saré peblià dèi lo 2 jeillet 2012 su lo sito de l'Assessorà http//www.regione.vda.it/cultura é le-z-eunscrechón fo que arrevèyan i buró de l'Assessorà de l'éducachón é de la queulteua - Infoculture, eun Veulla i n° 16 de Creu-de-Veulla, san manqué pe lo 31 jeillet a 2 euye de la dèinon-a.
Eun sondadzo fé euntre le paèn di-z-écouillì l'a démoutró que le fameuille aprésion é recougnison le valeur de seutta inisiativa. Lo nombro di préeunscrechón, arrevéye de totte le-z-eunstetechón scolére de la réjón, l'è de 2458 é so baille de coadzo pe allé eundevàn. Donque, apepré 65 cours de patoué sarén organizó deun le déféente écoulle repartie su totta la réjón.
EUNSTITUCHÓN | préeunscrechón | Maternella | Élémantére | Secondéra de 1erdegré | Secondéra de 2erdegré |
Aoste | 425 | 114 | 214 | 54 | 43 |
Morgex | 223 | 70 | 127 | 26 | - |
Villeneuve | 136 | 36 | 73 | 27 | - |
Saint-Pierre | 170 | 23 | 119 | 28 | - |
Charvensod | 226 | 40 | 151 | 35 | - |
Nus | 127 | 29 | 81 | 17 | - |
Quart | 136 | 35 | 81 | 20 | - |
Gignod | 139 | 50 | 73 | 16 | - |
Châtillon | 253 | 49 | 141 | 49 | 14 |
Saint-Vincent | 173 | 50 | 117 | 6 | - |
Verrès | 294 | 71 | 172 | 47 | 4 |
Pont-Saint-Martin | 156 | 51 | 97 | 8 | - |
TOTAL | 2458 | 618 | 1446 | 333 | 61 |
Seutta inisiativa, que s'eunsérèi deun lo cadro de la poleteucca di lenve que l'Assessorà organize pe la protéchón é la promochón de la lenva di queur di Valdotèn baille eunna nouvila opportunitó pe euncoadjé la diffujón de seutta lenva que pourte eun lleu la memouée de tcheut é noutro grou patrimouéno queulterel - di l'Assesseur Laurent Viérin. To so pe eunretsì co depì totte le lenve prézente deun noutro paì é a l'écoulla. De seutta magnie, la lenva veun patrimouéno de tcheut : lenva de noutre vioù, espréchón de noutre rèis, mi eun mimo ten lenva d'euntégrachón que permè, euncó a sisse que son po nèisù inque, de se recougnitre deun seutta comunitó é deun se valeur.
L'eunsègnemèn di patoué l'è an valeur eun pi di momàn que, avouì lo fransé, l'italièn, l'anglé, l'allemàn é le lenve walser, avantadze l'appor queulterel é lenguesteucco de l'écoulla eun baillèn pi de fose i santemèn de partadzo euntre tcheu le Valdotèn é eungn euncoadzèn l'iverteua é le-z-étsandzo euntre le déféente queulteue.