• Aqueuille
  • Noalle
  • Concours Cerlogne : y ehcole qu’i l’an gagnà a 54a éditsión

Concours Cerlogne : y ehcole qu’i l’an gagnà a 54a éditsión

27 mai 2016

(patoué dé Bretsón)

A 54a éditsión dou Concours Cerlogne l'a levrà apré douch djor dé féhta é Charvensod é l'ét aroà o momèn dé fére o bilàn.

Pé l'éditsión 2015/2016, comme l'acohtuma, dé tsenténe dé ehcoyé valdouchtàn l'an travayà, pendàn teu l'an d'ehcola, so eun arguemèn propozà, pé réalizé un dossié douque beutté le rézultat da retchertcha. Tseht'an falae porté avante a retchertcha so le « saé-fére » dou nohtro territouére qu'a l'ae comintsà l'an pasà.

Ou lon dé l'an, dacohte tsa retchertcha, le classe l'an partisipà a d'animatsión queulterelle é so a lénga, prézentà pé dé echpert én patoué. O but ou y ira dé fére cogniche i minà le « saé-fére » valdouchtàn, pé aidé o travai dé y énségnàn, surtoù dou y é pa tan d'ehcoyé qu'i prèdjon patoué.

En pieuch, pé aprechté le dossié, y énségnàn l'an pouchù fére couénquio so o Gnalèi, én particuyé pé a grafì dou patoué.

Pé levré, comme l'an pasà, l'an ichtà aprechtà dé matériél didatécco : un levret d'énformatsión dessénà é un djouec so le « saé-fére » traditsionél.

Apré totta tsa londja attévétà, son ichtà prézentà dé y ehcolé bén 59 travai dé retchertcha qu'i l'an ichtà djedjà dé eunna commisión beuttà én pi dou Centre d'Études Francoprovençales « R. Willien ».

A commisión l'at echteguià le dossié so a baze dé eunna gréya pé fére un classemèn é doné un pri én sot a y ehcole.

Pé doné le pouént, l'an ichtà aità o rechpet dé l'arguemèn, a retchetsa dé y énformatsión é a manira dé ié impié, a prézéntsa dou patoué, l'organizatsión dé y attévétà feutte pé valorizé o patoué, a calétà dou matériél troà.

Eunna grousa émportantsa l'at ichtà donà ou rapport so o travai qué y énségnàn déaon aprechté pé prèdjé da iour manira dé travayé, dé y echtremèn didatécco qu'i l'an impià, dé l'éntégratsión ou programma dé l'ehcola.

Apré l'ézamèn, a comisión l'a donà a valutatsión dé étchéléntsa é 100 € a 18 dossié qu'i rehpognaon a touit le critére. Y atre travai l'an rétsù a valutatsión dé « bén » é « moué bén » é le pri dé 70 € ou 90 €.

En jénéral, tseht'an le travai l'an ichtà dé bona calétà é, caje contùn, l'an rechpéttà y ordre é le tén.

Eun élémèn émportàn l'at ichtà a calétà dou patoué én touit le dossié.

Vouélà a lichta di classe qu'i l'an aù o pri d'étchéléntsa ;

I.S. J.B. Cerlogne     Ehcola Maternella dé Sarre-Chesallet

I.S. M. I. Viglino      Ehcola Mouayennna dé Villeneuve, classe dé IIC

                                    Ehcola Elémentére dé Cogne, classe dé III é V

I.S. Grand-Combin Ehcola Elémentére dé Valpelline, classe dé I é II

                                    Ehcola Elémentére dé Valpelline, classe dé III, IV é V

I.S. Abbé P. Duc       Ehcola Elémentére dé Châtillon-La Sounère, classe dé I é II

                                    Ehcola Maternella dé Verrayes-Chef-lieu, sétsión A, B, C

I.S. Luigi Barone     Ehcola Maternella dé Brusson, sétsión I é II

                                    Ehcola Maternella dé Challand-St-Anselme

                                    Ehcola Elémentére dé Challand-St-Victor

                                    Ehcola Elémentére dé Brusson

                                    Ehcola Mouayennna dé Brusson, classe dé I F, II F, II G

I.S. Evançon 2          Ehcola Elémentére d'Arnad, classe dé I é II

                                    Ehcola Elémentére d'Arnad, classe dé III, IV é V

                                    Ehcola Maternella d'Arnad, sétsión 1 é 2

I.S. Mont-Rose A     Ehcola Maternella dé Champorcher

                                    Ehcola Elémentére dé Donnas-Vert

I.S. Mont-Rose B     Ehcola Elémentére é Maternella dé Perloz