(patouè de Veullanoua)
Comme tcheu le-z-àn, le-z-eunségnàn di-z-écoule maternelle, élémantére, mouayenne é di supérieur son quèrià a apreusté lo térèn pe lo 50° Concours scolaire de patois Abbé Jean-Baptiste Cerlogne.
L'Assessorà de l'éducachón é de la queulteua, deun se-z-attivitó queulterelle é didatteuque, organize le Journées d'information su lo francoprovensal é lo walser, course de formachón pensó pe apreusté la partésipachón i prochèn Concours Cerlogne. Eungn effè lo stage l'a comme but hi de baillé i-z-eunségnàn de stremèn de traille pi funchoun-el i-z-attivitó projététe é prévèi, étò, de conféranse su lo tème trattó pe lo Concours, de moumàn de refléchón é de formachón su la grafia de la lenva é su de laboratouéo spésefeucco.
Lo course l'è organizó di 5 i 6 sétambre queeun. Lo sièje é lo programme vignérèn comunicó drè poussiblo.
L'Assesseur Laurent Viérin souligne que le Journées d'information son eun moumàn de formachón é de rancontre pe le-z-eunségnàn é, eunsemblo i-z-attivitó di Concours Celogne que ocupon to l'an, l'an an grousa eumpourtansa pe la difujón di patouè, lenva di queur di valdotèn, deun l'écoula é euntrì le nouile jénérachón.
Le-z-Istituchón scolère dèyon fée aì a l'Assessorà la fiche pe s'eunscrire avouì lo non di-z-eunségnàn euntéréchà a heutta attivitó, devàn que lo 30 jeun queeun.
P'aì pi de-z-eunfoumachón :
Assessorà de l'éducachón é de la queulteua - Rua Grand Eyvia, 59.
Tél. 0165/363540-43386