(patoué de Tsaensoù)
L'Assesseur a l'éducachón é a la queulteua de la Réjón otonomma Val d'Ousta eunfourme que lo 52o Concour de patoué Abbé Jean-Baptiste Cerlogne, saré organizoù, comme tcheu le-z-àn, eun collaborachón avouì lo Centre d'Études Francoprovençales René Willien de Sen-Nicolà.
Lo concour l'è rezervoù :
- i-z-eunségnàn é i-z-icouillì di-z-icoulle maternelle é élémantére ;
- i professeur é i-z-icouillì di-z-icoulle sécondére de premì é de secón grado.
La partisipachón i concour l'è gratouita é dimande la prézentachón a l'Assessorà di rezultà di traaille de retsertse fé, eun patoué, si lo sujé itablì.
Sujé
Lo sujé cherdì pe sit an d'icoulla 2013-2014 l'è : A la déqueverta de noutre veulladzo é de leur prodouì .
Eidzo leungueusteucco
Lo Guetset leungueusteucco de l'Assessorà fornèi eungn èidzo leungueusteucco i-z-eunségnàn que féyon dimanda pe revire le teste eun patoué di traaille de retsertse que sarén pi prézentoù.
Parcour d'animachón eun francoprovensal
Eun pi, l'Assessorà propouze, i-z-eunségnàn euntéréchà, eun parcour d'animachón eun francoprovensal avouì l'euntenchón de permettre i-z-icouillì que cougnisson pa é que prèdzon pa lo patoué, de déquevrì la lenva.
Si parcour prévèi l'euntervenchón eun cllasse d'esper leungueusteucco, aprestoù pe so, que prodouèison pi le contenù de seutte rancontre d'animachón si lo sujé di concour.
Eun bailléré, avàn totte, eumpourtanse i-z-eunségnàn que l'an partisipoù i Dzornoù d'eunformachón pe apresté lo Concour Cerlogne, mi étó i cas iaou deun eunna cllasse n'a pocca de patouazàn.
Fita finala
La fita finala de la 52a édichón di Concour Cerlogne saré féta deun la quemeua de Donnas i mèis de mi 2014. Le-z-espèize de transpor sarén a tsardzo de l'Assessorà.
Eunscrichón
Le-z-eunségnàn que voulon partisipé a seutta 52a édichón di Concour Cerlogne fa que prézentèyan a l'eunstituchón scoléra la fiche d'eunscrichón, sé appeuillaye, rampliya amoddo, douàn lo 15 de otobre 2013.
Dégust'alp
Deun lo projé de coopérachón térritoriala Interreg I/F Dégust'alp, l'è prévua an collaborachón euntre lo Celva (Consorzio Enti Locali della Valle d'Aosta) é l'Assessorà pe sen que conserne l'organizachón de la 52a édichón di Concour Cerlogne.
Le-z-atre ranségnemèn si la 52a édichón di Concour sarén pi drè baillà i partisipàn aprì avèi resì le-z-eunscrichón.
Eunformachón :
Mma Cristina Mensi
ASSESSORÀ DE L'ÉDUCACHÓN É DE LA QUEULTEUA
BREL
16, Creu de Veulla
11100 VEULLA
email : brel@regione.vda.it
Tél. 0165 363540 / 43386 Fax 0165 44491