Tsertsa

Dichonéo

Contenù di site

Multimédià

Teste eun patoué

Documàn

50a édichón di Concours Cerlogne - Recor d’adéjón

21 mars 2012

(patoué de Tsaensoù)

L'Assesseue a l'éducachón é a la queulteua Laurent Viérin esprime sa pi groussa satisfachón pe la préparachón de la 50a édichón di Concours Cerlogne, que s'annonse comme eunna édichón sensa présédèn.

Deun choui-z-àn, lo numéró de partisipàn l'è plan planotte passoù de 3200 a 4200 sit an, donque 1000 dzi de pi é, maque pe lo 2012, 600 eunscrichón eun pi : si total iton-àn pren eun considérachón le-z-icouillì di-z-icoulle maternelle, élémantére é mouayenne de la Réjón. A seutta tseuffra eun djonte, comme tsaque an, le mèinoù di-z-icoulle de Savoué, di Pouilles é di vallaye di Piémón que partadzon avouì no l'orgueuil é la fiertoù de predjì euncó eun patoué.

Créoù l'an 1963 pe René Willien é organizoù pe l'Asséssorà de l'éducachón é de la queulteua de la Réjón otonomma de la Val d'Ousta que, sit an, l'a cherdì comme siéje la queumeu-na de Fin-is, lo Concours Cerlogne l'a pe michón salla de sovegardì é de beuttì eun valeue la queulteua francoprovensala. La fita finala - que saré sit an a Fin-is lo 16, 17 é 18 de mi - reprézente eugn occajón d'itsandzo é de partadzo pe tcheu le-z-icouillì que l'an traaillà to l'an si lo sujé.

Lo fé que lo Concours Cerlogne déèye dèi tan de-z-àn, comme seutta énorma partisipachón, seuncant an aprì sa nessanse, l'è l'iproua que la poleteucca queulteurella de l'Asséssorà de l'éducachón é de la queulteua l'è dédiaye a beutté en pià de-z-inisiative que l'an l'euntenchón de sovegardì lo francoprovensal, élémàn eumpourtàn de noutro patrimouéno immatériel, de lo valorizì é de lo diffujì, va deun la bon-a direichón é contegne a pourtì profì.

L'Assésseue affirme que si rézultà no rejouì é no euncoadze a contegnì si lo tsemeun de la valorizachón di patoué, chouivì deun le déri-z-àn. Lo patoué l'è eungn élémàn a mimo de beutté eunsemblo de dzi que partadzon l'espouèe de s'esprimì deun eunna lenva plein-a de valeue é de vrèi santimàn é de se recougnitre - que sèyan le dzi mimo valdotèn ou bien d'adochón - deun le valeue leunguesteucco é queulterel de noutro peuple é de noutra communotì. An lenva, seumbole de noutra istouére é de noutra idantitoù, mi que, deun seutta noua consechón, l'é eun fatteue d'iverteua é d'euntégrachón, eunna opportunitoù « eun pi » pe tcheu sisse que louon approtchi-se. L'Asséssorà contegne a traaillì pe le dzouin-o. A partì de l'an queun, lo patoué saré moutroù deun le-z-icoulle, vi que lé, le nouile jénérachón se fourmon deun poueun de vua leungueusteucco é queulteurel. Lo patoué saré moutroù de fasón nouila é amuzanta pe favorizì l'euntéré eunvèe le mèinoù péqué sèye pamì considéroù comme lenva de la tradechón, mi étó comme lenva d'euntégrachón, patrimouéno de totta la communoté.

Diffièn son le sussè ottegnà pe lo patoué comme la comédì muzicala « Tourna avoui mé », avouì lo Concours Cerlogne, le course de l'Icoula Populéra de patoué é le Bén de lénva, le dzornoù de la sivilizachón, lo Festival di peuple minoritéo é lo journal « La voix des peuples minoritaires » ; lo Guetset leungueusteucco, lo projé « Théâtre populaire » ; la collechón de documantéo si le minoritoù leungueusteuque « Des visages et des mots » ; le-z-iteudzo d'antropolojia « Les nouveaux patoisants » ; l'espozechón « Les lieux du patois » ; la créachón d'audio-livro llizì a la sivilizachón valdoténa ; la diffujón, deun le-z-icoule valdoténe, di Dichonnéro di petsou patoésan ; lo Projè Popón ; lo premì fotoromàn eun patoué, Dapertotte - téatro dapertotte ; la messa eun patoué ; lo projé de prézentachón a l'UNESCO d' eunna dimanda eunternachonala é pe le péi de frontchiye pe èi la recougnissanse di patoué comme patrimouéno immatériel de l'ommo ; l'èidzo a la Fédérachon é i-z-inisiative comme lo Charaban é lo Printemps théâtral, comme le piise icriète é resitaye pe rappelé la fegueua de l'Abbé Cerlogne é di tsanouéno Bréan ; « La clé de la maison », espérianse de téatro pe le tsemeun, é d'atre projé euncó. Sussè que euncoadzon l'Asséssorà a mantegnì l'engadzemèn vèe lo patoué é a créì de-z-occajón pe lo valorizì péqué vegnèye an lenva de communicachón todzòo pi attuella é euntéressanta.