(patouè de Veullanoua)
La littérateua eun patouè, belle se l'a po aù la mima diffujón di littérateue fransèze é ossitan-e, l'è po sensa retsèhe. Eun pou remarqué que d'abetudde l'arue caze jamì di grou santre de la réjón. Eungn effè, Lyon l'a vitto eumpléyà la lenva di Rèi de Franhe comme lenva écrita é l'a po poussù vin-ì eun santre a mimo de eumpouzé an Koinè. Lo mimo discour vo euncò pe Genève, l'otra groussa veulla de la réjón francoprovansala, que l'a cherdù lli étò lo fransè.
A par coutche-z-atto di notéo é de l'éillize deun lo XIII sièclle, la littérateua eun patouè se developpe pitoù tar, po devàn lo Mouayèn Adzo.
Eun Val d'Ouha, l'abbé Jean-Baptiste Cerlogne, poète é idéateur d'eun sistème d'ortografì é de eun dichoun-éo que l'a ispiró bièn de-z-écrivèn de sa réjón, pou ihé retchan-ù lo fondateur de la littérateua valdotèna. A partì de se-z-écrì, bièn de-z-écrivèn l'an cherdù d'écrie leur teste eun proze, poézì é de téatro eun patouè. No vo le prézentèn deun heutta séchón.
