La Djornà éuropéenna di léngue.

26 septembre 2013

(patoué dé Tchalàn Damoùn)

Dou 2011, lo 26 dé sétémbre dé touit y an, sé fèi la Djornà européènna di léngue, introdouita da par dou Consèi dé l'Europa davo lo but dé fére compréndre i djen can l'et importàn prédjé pieu dé eunna lénga é pé vardé é donì pieu d'importantsa i différénte léngue é culteure qué son la richesse dé l'Europa.

Fan par dé tseutta richesse co totte li léngue minoritére, dja protéjà dou mimo Consèi dé l'Europa a travers eunna Carta Européenna pé li léngue minoritére di Natsión é di Réjón, firmà dé 22 étà, é a traver eunna Conventsión pé li léngue minoritére ou di réjón.

Touit y an tseutta djornà l'et sélébrà en i pais dé l'Europa en a y ehcoulle, université, pocht dé travai é dé chteuddio, organizatsión é assotchatsión culturelle, a travers la télévizión, li siti web o a travers l'organizasión dé conféréntse, dé letteure, dé létsión, dé dichcussión a propò da cognichéntsa di léngue é di noue stratéjì pé mouhtré.

Pé avé pieu d'enformatsión, noun pot alé su lo sito dou Consèi dé l'Europa: http://edl.ecml.at/.